“Keçmişə sarı”... Yazıçı Günel Anarqızının “Qarabağ hekayələri” silsiləsindən olan növbəti hekayəsi əsasında çəkilən film bugünkü günlə səsləşir...
“Keçmişə sarı” yazıçı Günel Anarqızının müxtəlif dillərə tərcümə edilən, dünyanın bir çox ölkələrində çap olunan “Qarabağ hekayələri” silsiləsindən növbəti əsərdi. 2017-ci ildə Milli Qəhrəman Rafiq Nəsrəddinov adına 39 saylı məktəbin şagirdləri hekayə əsasında film ərsəyə gətiriblər. Filmdə qəhrəmanları da elə məktəbin şagirdləri canlandırıb.
“Keçmişə sarı” hekayəsi ailənin yeganə övladı, cəbhəyə könüllü yollanan və Şuşa uğrunda döyüşlərdə qəhrəmancasına şəhid olan Məsim adlı gəncdən bəhs edir. Şəhidin valideynləri oğullarının itkisi ilə barışa bilmir, onlar oğullarının mövcud olmayan məzarı ilə vidalaşmaq üçün son qəpiklərinə Gəncə qatarına, oradan da Şuşaya getmək üçün bilet alır, “Keçmişə sarı” üz tuturlar. Hekayənin müəllifi Günel Anarqızı hekayənin bu günlə səsləşdiyini deyir: “Filmdə çox maraqlı rəmzi məna daşıyan məqamlar var. Onlardan biri şəhidin müharibəyə getməmiş evinin eyvanından bayrağımızı asmağıdır. İndi görürük ki, bütün şəhərimiz bizim bayraqlarımızla bəzədilib. Hər yerdə bayraqlarımız görünür. O zamanalr belə deyildi. Amma bu da rəmzi məna daşıyır. Mənə elə gəlir ki, ümumiyyətlə, həyatda heç bir şey əbəs yerə olmur, və hər şey ədalətli sonluğuna gəlib çatır. Necə ki, biz indi ədalətli şəkildə qələbəmizi qeyd edirik”.
Qarabağ bizi “keçmişə sarı” apardı, bundan sonra isə gələcəyə də götürəcək.
Ülviyyə Heydərova